Agtergrond

Van 'n ondernemende projek wat in 1995 tot stand gebring is om die kollig op die skerpste Afrikaanse reklame te vestig tot 'n omvattende, eg Suid-Afrikaanse reklamefees wat moedertaalreklame op die voorgrond stel. Dít is die pad wat Pendoring die afgelope 21 jaar geloop het.

Suid-Afrika spog met van die skerpste skeppende breins en die uitdaging vir Pendoring is om die gebruik van alle inheemse tale te bevorder sodat elke taal sy regmatige plek in die reklame-omgewing kan inneem.

Die afgelope twee dekades het Pendoring ontwikkel in 'n omvattende veldtog wat gerig is op die bevordering van 'n sterker en wyer bewustheid van die krag van moedertaal-kommunikasie met 'n bepaalde teikenmark, of dit nou in Afrikaans, Zoeloe of Xhosa, of enige van die ander inheemse tale in Suid-Afrika is. Dié fokus spruit uit die feit dat verbruikers geneig is om hul harte, koppe en beursies meer geredelik oop te maak wanneer daar met hulle in hul moedertaal, die taal waarin hulle dink, gekommunikeer word.

Te meer, Pendoring is ook uniek in soverre dit die enigste reklamekompetisie in SA is met beduidende kontantpryse, nie slegs vir die algehele wenners nie, maar ook vir wenners van goue en silwer trofeë in elke kategorie.

Benewens sy lojaliteit aan sy sterk Afrikaanse wortels, word Pendoring ook toenemend beskou as die ideale voertuig om kreatiwiteit en hernieude belangstelling in al die ander inheemse tale te bevorder.

Terselfdertyd bewys plaaslike sowel as internasionale navorsing keer op keer dat die styl, humor en impak van 'n handelsboodskap veel kragtiger word as dit in die huistaal van 'n teikenmark gelewer word.

Navorsing toon voorts dat Engels die huistaal van net 9.3% van al die mense in Suid-Afrika is. Om die meerderheid verbruikers te bereik, het dit sakesin om in hul moedertaal te adverteer. Maatskappye wat dié werklikheid besef en in die taal van 'n spesifieke teikenmark belê, behoort 'n beduidende opbrengs op hul belegging te sien.

In die lig hiervan, het die Pendoring-direksie besluit om alle kategorieë van die toekennings vir alle inheemse tale in Suid-Afrika oop te stel. Dit beteken dat moedertaalreklame voortaan op gelyke voet met Afrikaanse inskrywings gaan meeding – en beloon gaan word.

Pendoring se hoogste eerbewyse, die Prestige- en Umpetha-toekennings, gaan voortaan ook gelykwaardig wees en beide 'n oorsese studiereis ter waarde van R100 000 vir onderskeidelik die algehele wenner van die beste werk in Afrikaans en in die inheemse tale-afdeling behels. Insgelyk gaan die wenners van sowel die beste Afrikaanse werk en in 'n inheemse taal in die studentekategorie elk R10 000 kontant ontvang. Daarbenewens ontvang die wenner van 'n goue Pendoring R6 000, terwyl wenners van silwer Pendoring-trofeë elk met R2 500 wegstap.